唔經唔覺, 已經裝修好10個月, 雖然裝修後有d地方唔滿意, 特別係廳和父母房的傢俱顏色, 但係住落望慣咗, 已經冇咁唔開心(但依然覺得唔靚). 裝修完之後, 屋企真係整齊和舒服好多!

今日沖涼時突然諗起, 好彩我當時堅持要裝浴缸而唔係企缸. 話說我地20年來都習慣用浴缸, 但係計劃裝修時, 媽咪聽朋友和裝修師傅講, 而家個個都整企缸, 冇人整浴缸架啦!

但係我就好鍾意浴缸, 原因有一堆:

- 據我所知(其實係自己齋諗和懶醒地推理), 有錢人的豪宅都係用浴缸, 或浴缸 + 企缸, 豪宅係唔會只用企缸的, 所以用浴缸會顯得高貴D。企缸之所以流行, 係因為地產商起得D廁所太細, 唔夠位整浴缸。我家茅廁既然啱啱好夠位整最細SIZE的浴缸, 一定唔可以放過呢個扮有錢人的機會!

- 我習慣早上洗頭, 用浴缸可以只伸上半身在浴缸上洗頭, 唔使整濕身(題外話, 好彩去旅行時, 酒店都係裝浴缸咋).

- 我媽咪有時鍾意手洗一D唔可以機洗的衫, 擺係浴缸洗, 又係冇咁易整濕個身.

- 有趟門的企缸要清潔門和門邊的縫隙, 浴缸就只需要更換浴簾, 簡單好多! 而且拉開浴簾後, 廁所會顯得寬敞D.

-雖然我而家冇浸浴的習慣, 但係萬一有可能或者若果我突然想浸浴, 都無問題, 如果只得企缸, 就只可以浸腳板.

媽咪聽完我上述的POINTS, 肯整浴缸, 整完佢都冇後悔.

(上述觀點只係我的個人意見和感覺, 大家可以參考吓, 再自己諗諗適合自己的選擇)